October 13, 2026

ஈரோடு மாவட்டம், அம்மாபேட்டை அருகேயுள்ள ஊமாரெட்டியூர், சுந்தராம்பாளையத்தைச் சேர்ந்த சரக்கு வாகன ஓட்டுநர் கோகுல்ராஜ் (34). இவர், அதே பகுதியைச் சேர்ந்த தேவராஜ் என்பவரின் மனைவிக்கு இன்ஸ்டாகிராமில் தொடர்ந்து மெசேஜ் அனுப்பி வந்துள்ளார். இந்த விஷயம் தேவராஜூக்கு தெரிய வந்துள்ளது. அதையடுத்து தன்னுடைய மனைவியைக் கண்டித்தவர், கோகுல்ராஜையும் நேரில் சந்தித்து ‘இனிமேல் என்னுடைய மனைவிக்கு நீ மெசேஜ் அனுப்பினால் நடப்பதே வேறு’ எனக் கடுமையாக எச்சரித்துள்ளார். ஆனால், அதன்பிறகும் கோகுல்ராஜ், தேவராஜின் மனைவிக்கு தொடர்ந்து இன்ஸ்டாகிராமில் மெசேஜ் அனுப்பி வந்ததாகச் சொல்லப்படுகிறது. இதனால் ஆவேசமடைந்த தேவராஜ், அக்.11-ம் தேதி தனது நண்பர்களான நந்தகுமார் (19), பிரசாந்த் (23), தரனேஷ் (23) ஆகியோருடன் சென்று, தனியாக பேச வேண்டுமெனச் சொல்லி கோகுல்ராஜை அழைத்துச் சென்று கடுமையாகத் தாக்கியுள்ளார். இதில் பலத்த காயமடைந்து பேச்சு மூச்சற்று கீழே விழுந்த கோகுல்ராஜை, தூக்கி வந்து அவரது வீட்டினருகே வீசிவிட்டுச் சென்றுள்ளனர்.  தகவலறிந்த வந்த கோகுல்ராஜின் குடும்பத்தினர், அவரை மீட்டு அந்தியூரில் உள்ள தனியார் மருத்துவமனைக்கு கொண்டு சென்றனர். பின்னர் அங்கிருந்து மேல்சிகிச்சைக்காக பெருந்துறை மருத்துவக் கல்லூரி மருத்துவமனையில் சேர்த்தனர். ஆனால், அவரது உடல்நிலை மேலும் மோசமடையவே, கோவை அரசு மருத்துவக் கல்லூரி மருத்துவமனையில் சேர்க்கப்பட்டார். தற்போது, கோகுல்ராஜ் சுயநினைவின்றி கவலைக்கிடமான நிலையில் சிகிச்சை பெற்று வருகிறார்.  இந்தச் சம்பவம் தொடர்பாக கோகுல்ராஜின் தந்தை சிவராஜ், அம்மாபேட்டை காவல் நிலையத்தில் அளித்த புகாரில் போலீசார் வழக்குப் பதிவு செய்தனர். தேவராஜ், நந்தகுமார், பிரசாந்த், தரனேஷ் ஆகிய நால்வரையும் கைது செய்து, நீதிமன்றத்தில் ஆஜர்படுத்தி சிறையில் அடைத்தனர். 

நாமக்கல் மாவட்டம், கபிலர்மலை பகுதியைச் சேர்ந்த இளைஞர் ஒருவர், ஓரினச்சேர்க்கை விருப்பம் உள்ளவர்களுக்கான டேட்டிங் செயலியைப் பயன்படுத்தி வந்துள்ளார். இதன் மூலம் நாமக்கல் பெரியப்பட்டியைச் சேர்ந்த நிவாஸ் (19) என்பவருடன் அவருக்குப் பழக்கம் ஏற்பட்டுள்ளது.  ‘நாமக்கல்லுக்கு வந்தால் ஓரினச்சேர்க்கையில் ஈடுபடலாம்’ என நிவாஸ் ஆசை காட்டவே, அதை நம்பி கபிலர் மலையைச் சேர்ந்த அந்த இளைஞர் சுமார் 10 நாட்களுக்கு முன்பு நாமக்கல் சென்றுள்ளார். பேருந்து நிலையத்திற்கு வந்த அவரை பைக்கில் பிக்கப் செய்துகொண்ட நிவாஸ், ஆள்நடமாட்டம் இல்லாத பகுதிக்கு அழைத்துச் சென்று அங்கு மறைந்திருந்த அவரது கூட்டாளிகளும் சேர்ந்து தாக்கியுள்ளார். அவரை மிரட்டி அவரது செல்போனில் இருந்து கூகுள்பே மூலம் ரூ.7 ஆயிரத்தை தங்களது வங்கிக் கணக்கிற்கு மாற்றிக்கொண்டு அங்கிருந்து தப்பிச் சென்றுள்ளனர். இதுகுறித்து பாதிக்கப்பட்ட இளைஞர் நாமக்கல் காவல் நிலையத்தில் புகார் அளித்தார்.  இந்தக் கும்பல், இதே செயலியைப் பயன்படுத்தி நாமக்கல் அருகேயுள்ள வி.ஜி.பட்டியைச் சேர்ந்த இளைஞர் ஒருவருக்கும் ஓரினச்சேர்க்கை ஆசை காட்டி வலை வீசியது. அக். 9-ம் தேதி அந்த இளைஞரையும் நாமக்கல்லுக்கு வரவழைத்து, ஆள்நடமாட்டம் இல்லாத இடத்திற்கு அழைத்துச் சென்று தாக்கி, ரூ.10 ஆயிரத்தை பறித்தது. பாதிக்கப்பட்ட அந்த இளைஞரும் நாமக்கல் போலீசில் புகார் அளித்தார். அடுத்தடுத்து நடந்த இந்தச் சம்பவங்கள் குறித்து தீவிர விசாரணை நடத்திய போலீசார், பணம் பறித்த கும்பலின் கூகுள்பே விவரங்களை வைத்து தேடினர். இதில், பெரியப்பட்டியைச் சேர்ந்த நிவாஸ் (19), தீபக் (20), ஜீவ பாரதி (20) மற்றும் சேந்தமங்கலம் பள்ளபாளையத்தைச் சேர்ந்த விஜய் (20) ஆகிய நால்வரும் இதில் ஈடுபட்டது தெரியவந்தது. போலீஸ் விசாரணையின் போது, கைதான நால்வரும் படிப்பை பாதியிலேயே விட்டுவிட்டு, கிடைக்கும் வேலைகளுக்குச் சென்று வந்ததும், உழைக்காமல் ஆடம்பர வாழ்க்கை வாழ வேண்டும் என்பதற்காக குற்றச் செயலில் ஈடுபட்டது தெரியவந்தது. மேலும், செய்திகளில் வந்த இதேபோன்று ஏமாற்றி பணம் பறித்த சம்பவங்களைப் பார்த்து, தாங்களும் இப்படிச் செய்ததாகத் தெரிவித்துள்ளனர். நால்வர் மீது வழக்குப்பதிவு செய்து கைது செய்த போலீசார் அவர்களை நீதிமன்றத்தில் ஆஜர்படுத்தி சிறையில் அடைத்தனர்.

சேலம் மாவட்டம், நங்கவள்ளி அருகேயுள்ள பெரியசோரகை பகுதியைச் சேர்ந்தவர் ராஜாத்தி. இவரது கணவர் சின்னப்பையன் 15 வருடங்களுக்கு முன்பு இறந்துவிட்டார். இவர்களது மகள் நதியா (வயது 19), பெரியசோரகையில் உள்ள கைலாஷ் மகளிர் கல்லூரியில் பி.காம் மூன்றாம் ஆண்டு படித்து வந்துள்ளார். நதியாவுக்கு ஒரு அண்ணனும், ஒரு தம்பியும் உள்ளனர். ராஜாத்தி கூலி வேலை செய்து குடும்பத்தை காப்பாற்றி வருகிறார். கடந்த 10-ந் தேதி வழக்கம்போல கூலி வேலைக்குச் சென்றிருந்த ராஜாத்தி, வேலை முடிந்து வீடு திரும்பினார். அப்போது நதியா வீட்டில் எந்த வேலையும் செய்யாமல், செல்போனும் கையுமாக இருந்துள்ளார். இதனால் கோபமடைந்த தாய் ராஜாத்தி, “லீவ் நாளிலாவது வீட்டில் வேலைகளைச் செய்யக்கூடாதா? ஆடு, மாடெல்லாம் தீவனம் இல்லாம இருக்கு… அப்படி நாள் முழுக்க யார்கிட்டதான் போன் பேசுவியோ?” என நதியாவைக் கண்டித்ததாகச் சொல்லப்படுகிறது. இதில் தாய்க்கும் மகளுக்கும் இடையே வாக்குவாதம் ஏற்பட்டுள்ளது.  இதன்பின், நதியா வீட்டின் உள் அறையில் படுக்கச் சென்றுள்ளார். மறுநாள் காலை 7.30 மணி ஆகியும் அவர் அறையிலிருந்து வெளியே வரவில்லை. தாய் ராஜாத்தி அறைக் கதவைத் தட்டியும் திறக்காததால், ஜன்னல் வழியே பார்த்தபோது, நதியா வீட்டின் கூரையில் இருந்த இரும்பு ஆங்கிளில் தூக்கில் தொங்கியபடி கிடந்ததைக் கண்டு  அதிர்ச்சியடைந்தார். அக்கம்பக்கத்தினர் உதவியுடன் அறையின் கதவை உடைத்து நதியாவை மீட்டு, மேட்டூர் அரசு மருத்துவமனைக்குக் கொண்டு சென்றனர். ஆனால், நதியாவை பரிசோதித்த மருத்துவர்கள் அவர் ஏற்கனவே உயிரிழந்துவிட்டதாகத் தெரிவித்தனர். இந்தச் சம்பவம் தொடர்பாக, நங்கவள்ளி போலீசார் வழக்குப் பதிவு செய்து விசாரணை நடத்தி வருகின்றனர்.