September 18, 2026

‘பங்குச் சந்தையில் முதலீடு செய்தால் குறுகிய காலத்தில் கோடி கோடியாய் சம்பாதிக்கலாம்’ என ஆசை வார்த்தை காட்டி, பெருந்துறையைச் சேர்ந்தவரிடம் ரூ.16.19 லட்சத்தை ஆன்லைன் செயலி மூலம் சுருட்டிய கும்பலை ஈரோடு சைபர் கிரைம் போலீசார் தீவிரமாகத் தேடி வருகின்றனர். பெருந்துறை பழைய பஸ் ஸ்டாண்ட் பகுதியைச் சேர்ந்தவர் கார்த்திகேயன் (50). இவருக்கு பங்குச் சந்தையில் முதலீடு செய்து லாபம் ஈட்டுவதில் ஆர்வம் இருந்துள்ளது. இதுதொடர்பான தகவல்களைச் சமூக வலைதளங்களில் தேடி வந்த நிலையில், அவரது வாட்ஸ்-அப்க்கு பங்குச்சந்தை தொடர்பான ஆலோசனைகள் வந்துள்ளது. ‘எந்த நிறுவன பங்குகளை எப்போது வாங்கினால் லாபம் கிடைக்கும்?’ என அந்த மெசேஜில் இருந்த தகவல்களின்படி கார்த்திகேயன் முதலீடு செய்ய, அவருக்கு ஓரளவிற்கு லாபம் கிடைத்துள்ளது. கார்த்திகேயன் தங்களின் வலையில் விழுந்துவிட்டதை உறுதி செய்த அந்த ஆன்லைன் கும்பல், தங்களுடைய சீட்டிங் வேலையை காட்டத் தொடங்கியது. ‘இந்த பிரத்யேக செயலியை (App) பதிவிறக்கம் செய்து முதலீடு செய்தால் இன்னும் அதிகமாகப் பணம் சம்பாதிக்கலாம்’ எனக்கூறி ஒரு லிங்கை அனுப்பியுள்ளனர். அதை முழுமையாக நம்பிய கார்த்திகேயன், அந்த செயலியை பதிவிறக்கம் செய்து கடந்த ஜூலை 21-ம் தேதி முதல் செப்டம்பர் 8-ம் தேதி வரை பல தவணைகளாக மொத்தம் ரூ.16.19 லட்சத்தை முதலீடு செய்துள்ளார். அவர் பணத்தை முதலீடு செய்யச் செய்ய, டிரேடிங்கில் அந்தப் பணம் பல்கிப் பெருகி, லட்சக்கணக்கில் லாபம் வந்ததைப் போல செயலியில் காட்டியுள்ளது. இதைப்பார்த்த கார்த்திகேயன்,  தன் பணம் பெருகி வருகிறது என்ற ஆசையில் இருந்துள்ளார். செப்டம்பர் 8ஆம் தேதிக்குப் பிறகு, ஆன்லைன் செயலியில் காட்டிய பெரிய தொகையைத் தனது சொந்த வங்கிக் கணக்கிற்கு மாற்ற முயன்றுள்ளார். ஆனால், பணத்தை எடுக்க முடியவில்லை. சில மணி நேரங்கள் கழித்துப் பார்த்தபோது, அந்த ஆன்லைன் செயலியே போனிலிருந்து மாயமாகி விட்டது. தான் ஏமாற்றப்பட்டதை உணர்ந்த கார்த்திகேயன், இது குறித்து ஈரோடு மாவட்ட சைபர் கிரைம் காவல் நிலையத்தில் புகார் அளித்தார். அதன்பேரில் வழக்குப் பதிவு செய்த போலீசார், பணம் பரிமாற்றம் செய்யப்பட்ட வங்கிக் கணக்குகள் மற்றும் வாட்ஸ்-அப் எண்களை வைத்து ஆன்லைன் மோசடிக் கும்பலை தீவிரமாகத் தேடி வருகின்றனர்.

ஈரோடு, பெரியசேமூர் தென்றல் நகர் பகுதியைச்  சேர்ந்த அண்ணாதுரை என்பவரது மகள் ரம்யாஸ்ரீ (வயது 26). பெற்றோருடன் சூரம்பட்டி குமணன் வீதியில் வசித்து வந்தார். எம்.இ. பட்டதாரியான ரம்யாஸ்ரீ, ஈரோட்டில் உள்ள ஒரு தனியார் கல்லூரியில் உதவி பேராசிரியையாகப் பணியாற்றி வந்தார். கல்லூரியில் படித்தபோது இவருக்கும், ஈரோடு கருங்கல்பாளையத்தைச் சேர்ந்த 24 வயது இளைஞர் ஒருவருக்கும் இடையே பழக்கம் ஏற்பட்டுள்ளது.  இருவரும் நெருங்கிய நண்பர்களாகப் பழகி வந்த நிலையில், ரம்யாஸ்ரீக்கு அந்த இளைஞர் மீது காதல் வந்துள்ளது. ஆனால், அந்த இளைஞரோ, “நீங்கள் என்னை விட 2 வயது மூத்தவர். இதனால் எங்கள் வீட்டில் திருமணத்திற்கு ஒப்புக் கொள்ள மாட்டார்கள்” எனக்கூறி, ரம்யாஸ்ரீயின் காதலை ஏற்க மறுத்ததாகச் சொல்லப்படுகிறது.  இதனால் ரம்யாஸ்ரீ மிகுந்த வேதனையில் இருந்துள்ளார். இதற்கிடையே, அந்த இளைஞர் ஏற்கனவே காதலித்து வந்த ஒரு பெண்ணை, இருவீட்டார் சம்மதத்துடன் சமீபத்தில் திருமணம் செய்துள்ளார். இந்த விஷயம் தெரியவந்ததும் ரம்யாஸ்ரீ மேலும் உடைந்து போயுள்ளார். இதற்கிடையே, அந்த இளைஞரின் தாயார் ரம்யாஸ்ரீக்கு போன் செய்து, “என்னுடைய மகனுக்குத் திருமணம் முடிந்துவிட்டது. இனிமேல் அவனுக்கு ஃபோன் செய்தால், அவனது குடும்ப வாழ்க்கையில் உன்னால் பிரச்னை வந்துவிடும். எனவே, இனிமேல் அவனுக்கு ஃபோன் செய்ய வேண்டாம்!” எனக் கூறியுள்ளதாகத் தெரிகிறது. இதையடுத்து, கடந்த சில நாட்களாகவே யாரிடமும் பேசாமல் சோகத்தில் மூழ்கியிருந்த ரம்யாஸ்ரீ, கல்லூரிக்கும் செல்லாமல் வீட்டிலேயே முடங்கி இருந்துள்ளார். தொடர்ந்து நீடித்த மன அழுத்தத்தின் காரணமாக, வீட்டில் யாரும் இல்லாத நேரத்தில் தூக்கிட்டு தற்கொலை செய்து கொண்டதாக கூறப்படுகிறது. தகவலறிந்து வந்த சூரம்பட்டி போலீசார், ரம்யாஸ்ரீயின் உடலைக் கைப்பற்றி பிரேதப் பரிசோதனைக்கு அனுப்பி வைத்தனர். மேலும், இச்சம்பவம் தொடர்பாக வழக்குப் பதிவு செய்து விசாரித்து வருகின்றனர். 

ஈரோடு மாவட்டம் சத்தியமங்கலம் அடுத்த திம்மையன்புதூரைச் சேர்ந்தவர் பாலசுப்பிரமணியன் (56). தனியார் நிறுவனம் ஒன்றில் பணிபுரிந்து வரும் இவர், வீட்டில் இருந்தபடியே மலிவு விலையில் மளிகைப் பொருட்கள், காய்கறிகள் மற்றும் வீட்டு உபயோகப் பொருட்களை வாங்குவது குறித்து ஆன்லைனில் தேடியுள்ளார். அவர் தேடிய சில மணி நேரங்களிலேயே அவரது வாட்ஸ்அப் எண்ணிற்கு ஒரு குறுஞ்செய்தி வந்துள்ளது. அதில், மிகவும் குறைந்த விலையில் வீட்டு உபயோகப் பொருட்கள் பெற இந்த ஷாப்பிங் செயலியைப் இன்ஸ்டால் செய்யுங்கள் எனக் கூறி ஒரு லிங்க் அனுப்பப்பட்டிருந்தது.  ஆஃபர் ஆசையால் அந்த லிங்கை க்ளிக் செய்து செயலியைத் தனது செல்போனில் பதிவிறக்கம் செய்துள்ளார். செயலியைத் திறந்து பொருட்கள் மற்றும் அவற்றின் விலைப் பட்டியலை சில நிமிடங்கள் மட்டுமே பார்த்துள்ளார். எந்தவொரு பொருளையும் அவர் ஆர்டர் செய்யவில்லை, பணப் பரிவர்த்தனையும் செய்யவில்லை.  ஆனால், அவரது வங்கி கணக்கிலிருந்து அவருக்குத் தெரியாமலேயே ரூ. 1,76,099 மாயமாகியிருப்பது தெரியவந்து அதிர்ந்து போனார். இழந்த  பணத்தை மீட்டுத் தரக்கோரி, ஈரோடு சைபர் கிரைம் போலீசில் புகார் அளித்தார். இதுகுறித்து ஈரோடு சைபர் கிரைம் போலீசார் வழக்குப்பதிவு செய்து விசாரணை நடத்தி வருகின்றனர்.

மதுரை மாவட்டத்தைச் சேர்ந்த 21 வயது இளம்பெண் ஒருவர் பெங்களூரூவில் உள்ள ஐ.டி. நிறுவனத்தில் பணியாற்றி வருகிறார். இவர் கடந்த 16ஆம் தேதி பெங்களூரூவில் இருந்து மதுரைக்குச் செல்ல மைசூரு–தூத்துக்குடி எக்ஸ்பிரஸ் ரயிலில் பயணம் செய்துள்ளார். முன்பதிவு செய்யப்பட்ட பெட்டியில் பயணம் செய்துகொண்டிருந்த நிலையில், 17ஆம் தேதி அதிகாலை ஈரோடு ஸ்டேஷனைத் தாண்டி ரயில் சென்றுகொண்டிருந்தது. அப்போது, அதே பெட்டியில் இளம்பெண்ணின் இருக்கைக்கு மேலே உள்ள இருக்கையில் பயணம் செய்துகொண்டிருந்த ஒருவர், மெதுவாக அப்பெண்ணின் அருகில் சென்று பாலியல் அத்துமீறலில் ஈடுபட்டதாகச் சொல்லப்படுகிறது.  இதனால் அதிர்ச்சியடைந்த அந்த இளம்பெண் கூச்சலிட்டுள்ளார். அதைக்கேட்டு சக பயணிகள் திரண்டு, சில்மிஷத்தில் ஈடுபட்ட நபரைப் பிடித்து கரூர் ஸ்டேஷன் வந்ததும் ரயில்வே போலீசிடம் ஒப்படைத்தனர். இதையடுத்து இளம்பெண் அளித்த புகாரின் அடிப்படையில் போலீசார் விசாரணை மேற்கொண்டனர். அதில், சில்மிஷத்தில் ஈடுபட்ட நபர், திருவள்ளூர் மாவட்டம் பொன்னியம்மன்மேடு, பிரகாஷ் நகரைச் சேர்ந்த செல்வவிநாயகன் (வயது 50) என்பது தெரிந்தது.  சம்பவம் நடைபெற்ற இடம் ஈரோடு ரயில் நிலைய போலீஸ் எல்லைக்கு உட்பட்டது என்பதால், செல்வவிநாயகனை ஈரோடு ரயில்வே போலீசிடம் ஒப்படைத்தனர். வன்கொடுமை தடுப்பு சட்டத்தின் கீழ் வழக்குப்பதிவு செய்து கைது செய்தனர். நீதிமன்றத்தில் ஆஜர்படுத்தி, ஈரோடு கிளைச் சிறையில் அடைக்கப்பட்டார்.