September 15, 2026

ஈரோடு மாவட்டம், பெருந்துறை அருகேயுள்ள ஈங்கூரில் மிகவும் பழமை வாய்ந்த தம்பிராட்டி அம்மன் திருக்கோயில் அமைந்துள்ளது. கொங்கு வேளாளர் சமூகத்தின் ‘ஈஞ்சன்’ குலத்தைச் சேர்ந்த 2,000-க்கும் மேற்பட்ட குடும்பங்களின் குலதெய்வக் கோயிலாக இது விளங்கி வருகிறது. இக்கோயிலை அப்பகுதியைச் சேர்ந்த ஈஞ்சன் குலப் பெரியவர்கள் நிர்வகித்து வந்தனர். நாளடைவில் இரு கோஷ்டிகளாகப் பிரிந்தனர். இதனால் எழுந்த நிர்வாகச் சிக்கல்களால், கோயிலை இந்து சமய அறநிலையத்துறை ஏற்க வேண்டும் என சுப்பிரமணி என்பவரது தலைமையிலான தரப்பு கோரிக்கை வைக்க, கோயில் நிர்வாகத்தினை அறநிலையத்துறை எடுத்து கொள்ள முடிவு செய்தது. இதற்கு சாந்தமூர்த்தி என்பவரது தலைமையிலான தரப்பினர் எதிர்ப்பு தெரிவித்து, கோயிலைத் தொடர்ந்து நிர்வகித்து வந்தனர். இந்த நிர்வாகப் போட்டியின் தொடர்ச்சியாக, கோயிலின் பொறுப்புக்களை தங்களிடம் ஒப்படைக்க வேண்டுமென சாந்தமூர்த்தி தரப்பினர் சென்னை உயர் நீதிமன்றத்தில் வழக்கு தொடுத்தனர். வழக்கை விசாரித்த சென்னை உயர் நீதிமன்றம், சாந்தமூர்த்தி தரப்பினரின் நிர்வாகம் செல்லத்தக்கது அல்ல என்றும், கோயிலை முன்பு நிர்வகித்து வந்த சுப்பிரமணி தலைமையிலான ‘தம்பிராட்டி அம்மன் அறக்கட்டளை’ கோயிலின் நிர்வாகப் பொறுப்புகளை தொடர்ந்து நடத்தலாம் எனவும் உத்தரவிட்டது. நீதிமன்ற உத்தரவை நடைமுறைப்படுத்த, இந்து சமய அறநிலையத்துறை தக்கார் தனலட்சுமி தலைமையில் சுப்பிரமணி தரப்பினர் இன்று (15.09.2026) கோயிலுக்கு வந்தனர். ஆனால், சாந்தமூர்த்தி தரப்பினர் கோயிலின் சாவிகளைக் கொடுக்க மறுத்து, பூட்டி வைத்துப் பிரச்சனை செய்தனர். இதனால் ஆத்திரமடைந்த சுப்பிரமணி தரப்பினர் திரண்டு வந்து ஈங்கூர் ரவுண்டானா அருகில் திடீர் சாலை மறியலில் ஈடுபட்டனர். இதனால் பெருந்துறை – சென்னிமலை சாலையில் போக்குவரத்து ஸ்தம்பித்தது. தகவல் அறிந்து வந்த சென்னிமலை இன்ஸ்பெக்டர் சிவக்குமார் தலைமையிலான போலீசார், போராட்டத்தில் ஈடுபட்டவர்களைச் சமாதானம் செய்து கோயில் வளாகத்திற்கு அழைத்துச் சென்றனர். இதனிடையே, சாந்தமூர்த்தி தரப்பினர் நிர்வாகத்தை ஒப்படைக்க 3 நாட்கள் கால அவகாசம் வேண்டுமென கேட்டனர். இதுகுறித்து சம்பவ இடத்திலேயே ஈரோடு வருவாய் கோட்டாட்சியர் முத்துசாமி, பெருந்துறை வட்டாட்சியர் செல்வகுமார், இந்து சமய அறநிலையத்துறை உதவி ஆணையர் சுகுமார் மற்றும் ஈரோடு டி.எஸ்.பி. முத்துக்குமார் ஆகியோர் இருதரப்பிடமும் தீவிர பேச்சுவார்த்தை நடத்தினர். ஆனால், உள்ளூர் தரப்பினர் சாவியை ஒப்படைக்க மறுப்பு தெரிவித்து சலசலப்பில் ஈடுபட்டனர். நிலைமை கைமீறிச் சென்றதால், ஈரோடு வருவாய் கோட்டாட்சியர் முத்துசாமியின் அதிரடி உத்தரவின் பேரில் கோயில் அலுவலகப் பூட்டு உடைக்கப்பட்டு, நீதிமன்ற உத்தரவுப்படி சுப்பிரமணியம் தரப்பிடம் நிர்வாகப் பொறுப்புகள் முறைப்படி ஒப்படைக்கப்பட்டன. சாலை மறியல், போக்குவரத்து ஸ்தம்பிப்பு மற்றும் அதிகாரிகளின் அதிரடி நடவடிக்கையால் ஈங்கூரில் பெரும் பரபரப்பு ஏற்பட்டது.

ஈரோடு மாவட்டம், சத்தியமங்கலம் அருகேயுள்ள கே.என்.பாளையம், செங்கோட்டை நகரைச் சேர்ந்தவர் செந்தில்குமார் (வயது 42), சமையல் தொழிலாளி. இவருக்கு சித்ரா என்ற மனைவியும், ஒரு மகளும் உள்ளனர். சமையல் வேலைக்குச் செல்வதாக சொல்லிவிட்டுப் போன செந்தில்குமார், 3 நாட்களாகியும் வீடு திரும்பாமல் இருந்துள்ளார். குடும்பத்தினர் அவரைப் பல இடங்களில் தேடியும் கிடைக்கவில்லை.   இந்த நிலையில், செங்கோட்டை நகருக்கு அருகேயுள்ள குமரன் நகர் பகுதியில் வாக்கிங் சென்ற சிலர், அங்குள்ள சாக்கடையில் ஆண் ஒருவர் ரத்த வெள்ளத்தில் பிணமாகக் கிடந்ததைப் பார்த்து, சத்தியமங்கலம் போலீசாருக்குத் தகவல் கொடுத்துள்ளனர். சம்பவ இடத்திற்கு வந்த போலீசார் உடலைக் கைப்பற்றி நடத்திய முதற்கட்ட விசாரணையில், அது மாயமான சமையல் தொழிலாளி செந்தில்குமார் என்பது தெரிந்தது. சம்பவம் நடந்த இடம் ஒதுக்குப்புறமான பகுதி என்பதால், இரவு நேரங்களில் குடிமகன்கள் அங்கு மது அருந்துவது வழக்கம். மேலும், அவரின் உடல் அருகே உடைந்த நிலையில் பீர்பாட்டில் கிடந்ததால், குடிபோதையில் ஏற்பட்ட தகராறில் இந்தக் கொலை நடந்ததா? என்ற கோணத்தில் விசாரணையைத் தொடங்கினர். இந்த கொலைச் சம்பவம் குறித்து வழக்குப்பதிவு செய்த போலீசார், அப்பகுதியில் இருந்த சிசிடிவி கேமரா காட்சிகளை வைத்து விசாரணையில் இறங்கினர். அதன் அடிப்படையில் அதேபகுதியைச் சேர்ந்த 17 வயது சிறுவனிடம் சந்தேகத்தின் பேரில் விசாரித்தனர். விசாரணையில், சிறுவனும் சம்பவத்தன்று அதே பகுதியில் மது அருந்திக்கொண்டு இருந்துள்ளான். பைக்கில் வீட்டுக்கு கிளம்பச் சென்ற சிறுவன், அருகில் மது அருந்திக்கொண்டு இருந்த செந்தில்குமாரிடம், “கொஞ்சம் தள்ளிப்போய் குடி, நான் பைக்கை எடுக்கணும்” என ஒருமையில் பேசியுள்ளான். இதனால் கோபமடைந்த செந்தில்குமார் அந்தச் சிறுவனிடம் வாக்குவாதத்தில் ஈடுபட்டுள்ளார். ஒருகட்டத்தில் கைகலப்பாக மாறி, ஆவேசமடைந்த அந்தச் சிறுவன் அருகிலிருந்த பீர்பாட்டிலை எடுத்து செந்தில்குமாரின் தலையில் ஓங்கி அடித்துள்ளான். அதில் அவர் எதிர்பாராதவிதமாக இறந்துவிட, அங்கிருந்து தப்பிச் சென்றது தெரியவந்தது. அதையடுத்து கொலை செய்த சிறுவனை போலீசார் கைது செய்தனர். பத்தாம் வகுப்பிற்கு மேல் படிப்பை தொடராமல், சிறுசிறு கூலி வேலைகளைச் செய்துவந்த சிறுவன், மது போதையில் ஏற்பட்ட தகராறில் கொலை செய்தது சத்தியமங்கலத்தில் பெரும் அதிர்ச்சியை ஏற்படுத்தியுள்ளது.