September 17, 2026

திருப்பூர் நஞ்சப்பா மாநகராட்சி மேல்நிலைப் பள்ளியில் தலைமை ஆசிரியராகப் பணியாற்றி வருபவர் கர்னல் (54). இந்தப் பள்ளியில் பிளஸ் டூ படித்துவரும் மாணவர்கள் 6 பேர், தினசரி வகுப்புகளுக்கு வராமல், நேரடியாக காலாண்டுத் தேர்வெழுத மட்டும் வந்துள்ளனர். இந்தத் தகவல் பள்ளியின் தலைமையாசிரியரான கர்னல் கவனத்துக்கு சென்றுள்ளது. அதையடுத்து அவர் அந்த மாணவர்களை அழைத்து, பள்ளிக்கு தொடர்ச்சியாக வராததற்கான காரணத்தைக் கேட்டு விசாரித்துள்ளார். மாணவர்கள் ஆளாளுக்கு ஒரு காரணத்தைச் சொல்ல,  “ஸ்கூலுக்கு தொடர்ந்து வராமல், தேர்வெழுத அனுமதிக்க முடியாது” எனச் சொல்லி கண்டித்து அனுப்பியுள்ளார்.   சிறிது நேரத்தில் திபுதிபுவென தலைமையாசிரியர் அறைக்குள் புகுந்த அந்த பிளஸ் டூமாணவர்கள், தலைமையாசிரியரை கடுமையாகத் தாக்கியுள்ளனர். சத்தம் கேட்டு அருகிலுள்ள வகுப்பறையில் இருந்த ஆசிரியர்கள் ஓடிவந்து பார்த்தபோது, மாணவர்கள் தாக்கியதில் தலைமையாசிரியர் முகத்தில் காயம் ஏற்பட்டு ரத்தம் கொட்டியுள்ளது. காயமடைந்த தலைமையாசிரியரை கல்லம்பாளையம் மாநகராட்சி ஆரம்ப சுகாதார நிலையத்துக்கு அழைத்துச் சென்றனர். அங்கு அவருக்கு சிகிச்சை அளிக்கப்பட்ட பிறகு பள்ளிக்குத் திரும்பினார். இந்தச் சம்பவம் குறித்து தகவலறிந்து பள்ளிக் கல்வித்துறை அதிகாரிகள் மற்றும் போலீசார் பள்ளிக்கு வந்து, தலைமையாசிரியர் மீது தாக்குதல் நடத்திய மாணவர்களை தனித்தனியாக அழைத்து  விசாரித்தனர். இந்த சம்பவம் தொடர்பாக திருப்பூர் மாவட்ட முதன்மை கல்வி அலுவலர் புனிதா அந்தோணியம்மாள் அவர்கள், “தலைமை ஆசிரியர் மீது மாணவர்கள் தாக்குதல் நடத்தியது மோசமான செயல். சம்பந்தப்பட்ட மாணவர்கள் மீது கடுமையான நடவடிக்கை எடுக்கப்படும்” எனக் கூறியுள்ளார்.